قدر ولطف‏..!!‏
عبر النتيبدأ مكتب تنسيق الجامعات خلال ساعات توزيع دفعة جديدة من ضحايا وهم التعليم الجامعي لأن الجميع في النهاية ـ سواء بالثانوية أو بالرخصة الجامعية ـ علي القهوة بشحم الفابريقة‏..!!‏ وأتوقع ـ مع ذلك ـ أن تشهد كليات الطب إقبالا شديدا ـ رغم قرار خفض أعداد المقبولين فيها ـ أملا في أن يصبح الجميع أطباء للأنف والأذن والحنجرة والذين أتوقع أن يتحولوا إلي مليارديرات وذلك نتيجة ما نفعله بأنفسنا‏..!!‏فأي طبيب في هذا التخصص سيأكل الشهد ـ علي رأي عمتي فريدة الله يرحمها ـ لأنه مش هيلا حق علي الزبائن التي هتترصص في العيادة وعلي سلالم العمارة إللي فيها العيادة إضافة إلي الطوابير الطويلة في الشارع وعلي القهاوي‏!!‏يا إخوانا إحنا بقينا شعب أطرش ما بنسمعش يعني هناك أكثر من‏76‏ مليونا و‏143‏ ألف و‏678‏ مواطنا هيبقوا زباين للعيادة‏..‏ وياهناه يا سعده دكتور الأذن‏,‏ لأن أمه داعية له في ليلة القدر‏!!‏فعلي المستوي الاجتماعي ستجد نفسك صحوت فجأة من النوم علي صراخ وزعيق صادر من الشقة التي أمامك وستصاب بالرعب والفزع وكأنك حلمت بالأستاذ ذكي مدرس الحساب وهوباصص لك في فصل ثانية أول ويصرخ صرخته الشهيرة طلعوا كراسات الواجب‏!!..‏ المهم‏'‏ لما تخبط علي باب شقة جارك وتسأل خير يا جماعة؟‏..‏ هي فيه مصيبة حصلت لا قدر الله؟ ستجد الراجل صاحب الشقة بيبص لك نظرة مش حلوة ويقول لك لا دا أنا كنت بأقول للمدام اعملي لي كوباية شاي‏..‏ وتسمع صوت المدام من جوه المطبخ مين يا عزوز إللي جاي في ساعة زي ديه ويمكن كمان تتبع سؤالها ده برضه بوصف للي جاي في وقت غير مناسب‏!!‏الشارع بقي حاجة تانية خالص‏..‏ إذا نفدت من أصوات الرعد إللي طالعة من العربيات وهي بتجري وسايقها شاب روش ـ ومشغل الكاسيت علي أعلي درجة ـ ولم تصب بالطرش ـ مش هتنفد من أصوات الكلاكسات إللي بتضرب علي طول زي ما يكون إن إدارة المرور مشترطة علي أي حد يسوق عربية إنه يفضل حاطط أيده علي الكلاكس وبيسوق بأيد واحدة علشان يحصل علي رخصة القيادة‏!!‏علي المستوي الاجتماعي أيضا وبخاصة بالنسبة للعلاقة بين الناس والحكومة تلاقي الناس قاعدة تصوت وتصرخ من زيادة الأسعار وقلة الدخل وفي نفس الوقت الحكومة بتقول علي لسان وزرائها إن الأسعار بدأت تنخفض ويطلع لنا وزير يقول إن سعر العجوة انخفض في المجمعات الاستهلاكية‏!!‏ آه والله العظيم قال كده سعر العجوة إنما ما جبش سيرة أي سلعة تانيه تهم الناس زي مثلا باغات لياقات القمصان أو مربي السفرجل‏..‏ أو إبر بوابير الجاز أو أي سلعة من السلع المهمة دية‏!!‏ يعني في النهاية إن الحكومة حتي مش سامعانا‏!!‏أما علي المستوي السياسي هناك حدوتة كبيرة وخصوصا في الانتخابات البرلمانية‏..‏ الناس كانت بتقول رأيها في صندوق الانتخابات وتفاجأ بيه حاجة تانية خالص ودلوقتي بقت فيه موضة جديدة هي عدم تدخل الحكومة في الانتخابات بطريقه مباشرة يعني بتتدخل بطريقة غير مباشرة في صورة إنها تسيب سيدة الدكر ـ المسجلة خطر هي وأعوانها ـ علي لجان الانتخابات التي يشكون في إمكانية نجاح أي مرشح آخر غير مرشحهم‏..‏ والباقي بقي أنت عارفه‏..‏وإذا كنت ما تعر فش ـ فهذا أفضل لك بدل ما أقولك روح وجرب ولما تفوق إنشاء الله من الغيبوبة إللي هتدخل فيها لمدة‏3‏ أسابيع وتبص حولك هتلاقي المدام أمامك بس ما تسألهاش هي مين أو إيه إللي حصل إنما لما ربنا يقدرك وتقوم من السرير وتقدر تروح الحمام أبقي بص في المراية وأنت هتعرف إيه إللي حصل لك بس المشكلة وقتها إنك مش هتعرف مين إللي باصص عليك من المراية ولكن ستسمع أصوات المقربين لك وهم بيرددوا أوعي تزعل‏..‏ قدر ولطف‏!!

عبد العظيم درويش‏